Tal sît de ARLeF, te sezion “Materiâi”, e je a disposizion “Furlan Contât”, la publicazion che e da dongje i risultâts de ricercje sociolinguistiche “Tire fûr la lenghe”, realizade par capî e analizâ l’ûs de lenghe furlane e di chês altris lenghis feveladis in Friûl. La indagjin e je stade fate tal 2023 di IRES FVG in colaborazion cul FEF (Forskningscentrum för Europeisk Flerspråkighet) e un comitât sientific costituît di linguiscj des universitâts di Bolzan, Milan, Pavie, Trent e Vigo (Galizie). Dopo vê mandât fûr une selezion di dâts che i ricercjadôrs a àn otignût cuntune prime fase di elaborazion e analisi, il volum, che al è stât editât par cure de IRES FVG in colaborazion cu la Agjenzie, al met a disposizion de comunitât sientifiche, des istituzions e dai citadins un cuadri analitic detaiât dai risultâts de ricercje.
La ricercje, sostignude de Regjon Autonome F-VJ, e je stade realizade cul contribût de ARLeF inte suaze dal Plan gjenerâl di politiche linguistiche pe lenghe furlane 2021-2025.
Il studi si è fondât su passe 4.300 intervistis cjapadis sù in 178 Comuns dal Friûl-V.J. e dal Venit orientâl midiant di un cuistionari di uns cent domandis, par plui a rispueste sierade. Ancje il contribût di 74 Istitûts Comprensîfs al è stât fondamentâl: graciis al supuart dai insegnants, di fat, a àn permetût che la indagjin e rivàs intes fameis e che la rapresentazion de popolazion par etât e gjenar e fos largje e trasversâl.
Intal volum a vegnin presentâts la metodologjie doprade dai ricercjadôrs e i risultâts de grande cuantitât di dâts analizâts, cul supuart di taulis cartografichis e tabelis, dividudis daûr dai cjapitui: Famee, Comunitât, Competencis, Media, Ideologjie e Identitât. Cun di plui, la publicazion e ufrìs un confront cu lis ricercjis sociolinguistichis passadis, une analisi SWOT sul stât de lenghe furlane e une serie di riflessions e di propuestis pes politichis linguistichis futuris.
“La publicazion “Furlan Contât” – al evidenzie l’assessôr regjonâl Pierpaolo Roberti – e ufrìs un contribût fondamentâl pes azions di politiche linguistiche: la disponibilitât di evidencis inzornadis su lis modalitâts di ûs e lis dinamichis sociâls dal furlan, fondadis suntun campion une vore impuartant a nivel numeric, e rapresente un element strategjic par capî cemût che l’ûs de lenghe al è daûr a evolvisi, cualis che a son lis percezions de popolazion e lis prospetivis che si vierzin pal so avignî. Cheste publicazion e rapresente pe Regjon une base concrete par planificâ in maniere ancjemò plui cussiente une politiche linguistiche simpri plui eficace pal furlan, confermant il so impegn tal infuartî il so ûs e la sô difusion”.
“I dâts cjapâts sù cun cheste publicazion – al à declarât il president de ARLEF, Eros Cisilino – a rapresentin un imprest preziôs par capî in maniere precise il stât di salût de lenghe furlane e lis dinamichis sociâls, identitariis e culturâls che le rivuardin. Al è un lavôr che al fâs part dal percors di atenzion e responsabilitât condividude tra istituzions e mont de ricercje, che la ARLeF e promôf cun convinzion. Dome cul monitorâ in maniere rigorose e costante, di fat, si puedin programâ strategjiis e intervents valevui, adats aes dibisugnis dal teritori e de sô comunitât linguistiche”.
“Il volum – al rimarche Vittorio Dell’Aquila, membri dal comitât sientific che al à lavorât ae ricercje IRES FVG – al ufrìs un cuadri inzornât e articolât dai ûs dal furlan, des competencis declaradis, des pratichis linguistichis di ogni dì e des percezions de lenghe de bande dai locutôrs. La publicazion e documente il rûl de lenghe inte famee, intes relazions sociâls, inte scuele, a vore, intai uficis publics, intai media e intai contescj digjitâi. I dâts a son stâts selezionâts par garantî validitât statistiche no dome par gjenar e classe di etât, ma ancje par piçulis unitâts teritoriâls costituidis di plui Comuns individuâts za prin tant che omogjenis a nivel demografic e linguistic”.
La edizion di cjarte di “Furlan Contât” e vignarà donade in curt aes bibliotechis dal Friûl e ai esperts dal setôr. (a.d.g.) – 22.05.2026
