Leturis pes gnovis gjenerazions

Metudis in archivi lis zornadis une vere penzis de vincjesime setime edizion di “pordenonelegge”, la fieste dai libris e de libertât e ve indevant ator pe regjon cuntune schirie di incuintris dedicâts aes gjenerazions plui zovinis di letôrs de provincie di Pordenon. Il program “Fuoricittà_scuole”, di martars ai 6 di Otubar e fint ai 13 di Novembar, al tirarà dongje i students dal teritori intun viaç traviers i 13 comuns che a son stâts protagoniscj ancje de ultime edizion dal festival. Il program, dedicât aes scuelis mediis e superiôrs e ai ultins agns de scuele elementâr, al cjape dentri autôrs e autoris di nivel de sene leterarie taliane dal nestri timp: Chiara Carminati e Massimiliano Tappari, Giada Messetti, Antonio Ferrara, Annalisa Strada, Luigi Garlando, Davide Morosinotto, Lorenzo Pavolini e Antonella Sbuelz. Si tache martars ai 6 tal auditorium “Burovich” a Seiest cun Chiara Carminati (vincidore dal Premi Junior Campiello tal 2025) e il fotograf e scritôr Massimiliano Tappari, che a presentaran “Mare Mosso”. Il stes dì, il teatri di Sacâi al ospitarà Antonio Ferrara, autôr e educadôr che al à vinçût il Premi Andersen, par presentâ “Note ribelli”. Joibe ai 8, il Teatri Pileo di Prate al presentarà un event dopli, une altre volte vuidât di Chiara Carminati cun “Diario in corsa” e “Cose che fanno poesia”, scrits a cuatri mans cun Pia Valentinis. (A.I.) – 05.10.2026