L’an che al ven, “èStoria” e fevelarà di lavôr

Dai cults des civiltâts antighis aes gnovis spiritualitâts, la vincjesime seconde edizion di “èStoria” e la seste edizion dal” Festival dal Cine èStoria” a Gurize a àn contât la religjon, forsit un dai argoments plui complès, in particolâr in chest moment storic. Il program al à esplorât lis origjinis des grandis religjons e dai cults mancul cognossûts, chei leâts ae nature, dai natîfs americans aes religjons tradizionâls africanis. A son stadis tratadis cuistions di atualitât, par esempli la lôr conession complesse cu la politiche, sedi intal passât sedi in dì di vuê. Il public al à podût sielzi di ben 300 events, cunvignis, incuintris e presentazions cun 450 ospits talians e internazionâi. Intant che si davuelzeve l’event, il premi “èStoria” 2026 al è stât dât ae storiche Laura Pepe e a son stâts dâts premis speciâi ancje a Giulio Busi e Enzo Bianchi. Il diretôr dal festival Adriano Ossola al à za comunicât il teme pe prossime edizion: il lavôr, la fonde stesse de nestre democrazie. (A.I.) – 01.06.2026