La storie des puartadoris cjargnelis li de Filologjiche

Lis lûs dal arbul a son za tornadis te scjate e biel planc dut al è daûr a tornâ al so drandran di ducj i dîs. In Palaç Mantica (intal Salon di onôr), però, fin a domenie ai 14 si podarà ancjemò vivi il spirt des fiestis, in graciis dai ultins events te suaze de rassegne Nadâl in Filologjiche, inmaneade de Societât Filologjiche Furlane cu la poie dal Comun di Udin. Aes 6 sot sere, spazi ae leterature resinte, cu la leture “Fiore di roccia”, gjavade fûr dal libri di Ilaria Tuti su lis vicendis des puartadoris cjargnelis e insiorade dal sunôr dal mandulin di Andrea Miola e de ghitare di Giulia Pizzolongo, struments che i soldâts si menarin pardabon daûr in trincee, cun musichis de tradizion furlane e no dome, peadis propit a chel periodi storic. La jentrade e je sore nuie. (A.I.) – 11.01.2024