I abonâts dal “Candoni” al Museu des Arts popolârs

Il teatri fûr dal teatri midiant gnovis modalitâts di partecipazion de bande dal public. Al è cun chest spirt che e je nassude la colaborazion dal Museu cjargnel des Arts popolârs “Michele Gortani” di Tumieç cul Ert e cul Teatri Stabil Furlan, che a àn permetût ai prins 150 abonâts de stagjon teatrâl dal “Candoni” di viodi “Senza Memoria”, il spetacul itinerant gjavât fûr di un test di Carlo Tolazzi, inmaneât intai spazis dal Museu Gortani. Viodût che za te Sierade passade la iniziative e à vût un grant sucès, fasint dut plen cun passe 500 personis, il Museu al è in vore par meti in calendari gnovis replichis pal public e pai zovins des scuelis. (A.I.) – 05.03.2024