Un citadin austriac di 28 agns resident a Vilac al è stât puartat in salf tal dopomisdì su la cjadene de Mont Avostanis intes Alps Cjargnelis. L’escursionist al veve pierdût il segn dal troi passant un trat de traviersade cjargnele. Al jere partît di Cocau e al veve di rivâ in Val Valentute, ma al è finît fûr rote su lis cuestis setentrionâls de Crete di Tamau.
La Sores e à alertât lis scuadris dai socoridôrs de stazion di For Davôtri dal Socors Alpin e de Vuardie di finance di là dal elisocors regjonâl. I tecnics a son stâts imbarcjâts li dal cjamp base di Çurçuvint e puartâts a cuote alte: il tecnic di elisocors al è stât calât cu la binte a une cuote di 2.100 metris plui o mancul, dulà che, in graciis des coordenadis furnidis de Sores, al à rivât a individuâ l’escursionist. L’om si cjatave intun lûc tant ert e esponût, no plui in stât di lâ indevant, strac e disidratât: al è stât imbraghetât e tirât sù tal elicotar par dopo jessi disbarcjât al cjamp base di Çurçuvint in buine salût. (a.d.g.) – 11.08.2023
