Intervent di socors chest dopomisdì intun esercizi public dilunc di vie Nazionale, a Tavagnà. Une infermiere presinte sul puest e à viodût un om di plui o mancul 60 agns colâ par tiere e e à clamât daurman il Nue 112, par dopo scomençâ la rianimazion une volte scuviert che il cûr al veve molât di bati.
I infermîrs de Struture operative emergjence regjonâl sanitarie (Sores) a àn inviât sul puest l’ecuipaç di une ambulance e chel de machine di emergjence mediche.
Intant, cul supuart telefonic de Sores, la infermiere e à scomençât il massaç cardiac. Al è stât cjatât ancje un defibriladôr che dopo al è stât puartât sul puest e doprât tant che il cûr dal om al à tornât a bati. Il personâl medic infermieristic rivât intant al à continuât dopo lis manovris salvevite. L’om al è stât traspuartât in codiç ros al ospedâl Sante Marie de Misericordie di Udin. (A.D.G.) – 15.05.2023
