Passe 300 lis aziendis industriâls pleadis dal brut timp

Dopo i artesans e i agricultôrs, a son rivâts i conts dai dams provocâts aes impresis industriâls de provincie di Udin colpidis de tampieste e dal brut timp ai 24 e ai 25 di Lui. Confindustria Udine e à presentât la prime stime: lis aziendis cjapadis dentri a son plui o mancul 300 e i dams patîts a son sedi chei direts, consecuence di ploie, aiar e tampieste, sedi chei indirets. Ven a stâi, la mancjade produtivitât par diviers dîs, se no fintremai mês, par riparâ capanons e machinaris e rimplaçâ la materie prime che no si pues plui doprâ. La vicepresidente di Confindustria Udine, Anna Mareschi Danieli, e à anticipât ae Regjon F-Vj –che e domandarà il stât di emergjence– che la cifre stanziade inte manovre di assestament dal belanç, di pôc aprovade, no sarà a vonde. Tra lis domandis pussibilis: l’azerament de Irap. (A.I.) – 01.08.2023