I Carabinîrs de Compagnie di Udin, cu lis patuliis des stazions locâls e dal Nucli Operatîf Radiomobile, a àn fermât a Basilian un om di 32 agns che intal prin dopomisdì di joibe ai 19 di Zenâr al jere scjampât di une comunitât terapeutiche di Reane dal Roiâl dulà che al jere daûr a scontâ, in afidament in prove in sostituzion de preson, une pene detentive par tancj reâts cuintri la persone e il patrimoni.
Dut al è scomençât tor de une e mieze dal dopomisdì cuant che il zovin al à robât un auto doprât dai operadôrs de comunitât e dopo vê sfonderât il puarton di cente al è scjampât. Il responsabil de struture al à alertât daurman i Carabinîrs che a àn tacât lis ricercjis, cul implei di tantis patuliis intes zonis dulà che il zovin, ritignût pericolôs, si pensave che al podès rifugjâsi.
Il prin svolt aes ricercjis al è stât la segnalazion di une citadine di Udin che, tor des sîs e mieze di sere, e jere stade rapinade de sô Fiat Qubo de bande di un om che, de descrizion, al podeve jessi il zovin in fuide.
Aes 10 e 40 di sere, un citadin di Basilian al à denunziât il tentât robarie de sô Fiat Pont de bande di un sogjet che al podeve corispuindi ae descrizion dal om in fuide.
Delimitat, duncje, ancjemò di plui il teritori, i militârs, dopo une altre segnalazion di une altre tentade robarie intune abitazion a Basilian, a son rivâts a blocâ l’om che al veve provât a scjampâ ae cature corint intai cjamps. L’om arestât al è stât puartât ae preson di Udin. (A.D.G.) – 24.01.2023
