Vie pe gnot i Carabinîrs de Stazion di Polcenic a àn arestât in flagrance di reât doi zovins par robariis ingriviadis a Sacîl. La prime segnalazion e rimonte aes 2 e un cuart plui o mancul, cuant che la portinarie dal Ospedâl di Sacîl e à clamât il NUE112 visant che dentri de sale di spiete a jerin dôs personis che cul ûs di un martiel e di un scarpel a jerin daûr a sfuarçâ i distributôrs automatics dal cafè. E je lade daurman sul puest une patulie de Stazion di Polcenic, ma i autôrs de robarie a jerin scjampâts. E je scomençade, duncje, la cjace ai malvivents, individuâts e blocâts su dôs bicicletis dilunc de Vie Lacchin a Sacîl, intant che a jerin daûr a voltâ bande la stazion feroviarie. No si esclût che intai lôr intindiments e fos chê di lâ sù sul tren viers Mestre.
Un om di 35 agns talian e un di 31 agns portughês, residents in Venit e cun precedents par reâts cuintri il patrimoni e violazions in materie di droghe, a son stâts cjatâts in possès des monedis puartadis vie dal distributôr automatic (par un totâl di 37,50 euros) e dal martiel a pene doprât.
I doi, dut câs, no vevin cometût dome chel reât vie pe gnot, viodût che i Carabinîrs di Polcenic a àn ricostruît altris dôs robariis: intes borsis che a vevin i doi laris, i carabinîrs a àn cjatât varis gjenars alimentârs che tra chei butiliis di vueli, bussui di sotasêts, di ton e di sardons marinâts che i doi a vevin robât inte buteghe “Casa della Frutta” di Sacîl. De casse dal esercizi a jerin stâts robâts ancje 120 euros, cjatâts inte sachete de gjachete di un dai doi arestâts. Al esterni dal esercizi al è stât cjatât un pît di purcit, doprât par sfuarçâ la puarte di jentrade. Par ce che al tocje lis dôs bicicletis, infin, i doi lis vevin puartadis vie intes pertinencis di une abitazion inte frazion Ronceis di Sacîl.
Il malcjolt al è stât tornât inaûr ai parons. Su disposizion dal Pm di turni de Procure di Pordenon, i arestâts a son stâts puartâts inte preson di Gurize. (A.D.G.) – 23.01.2023
