Un om di plui o mancul 50 agns al è stât socorût cheste matine dal personâl sanitari pes feridis che al à ripuartât dopo di un signestri sul lavôr inte zone industriâl di Valnunciel, intal comun di Pordenon.
Par causis in cors di aciertament di bande dai agjents de Polizie di Stât, l’om al è colât di une scjale a une altece di plui o mancul doi metris, ripuartant un traume toracic.
Sul puest une ambulance di Pordenon e l’elisocors. L’infortunât, che al à patÎt la fracade al toraç, al è stât traspuartât in svol al ospedâl Sante Marie de Misericordie di Udin in codiç zâl.
Pôc plui tart, un om di plui o mancul 50 agns di etât al è stât socorût par un incident dentri di une ativitât produtive a Cecchini, intal comun di Pasian di Pordenon. L’om al è stât colpît al toraç di un pês di plui o mancul 50 chilograms. Rivâts sul puest une ambulance e la machine di emergjence mediche di Pordenon. Il ferît al è stât traspuartât tal ospedâl Sante Marie dai Agnui di Pordenon. (A.D.G.) – 11.04.2023
