La mobilitât sanitarie e à creât intal 2021 une licuidazion negative di 7,6 milions di euros in Friûl-Vignesie Julie. La nestre regjon e à debits par 94,2 milions – decime seste in Italie – par prestazions e ricovars di siei citadins fûr dai confins regjonâi. E à invezit credits par 86,6 milions – decime seconde a nivel nazionâl – par pazients di altris regjons che a son vignûts a curâsi chi.
Lu sotlinee la Fondazion Gimbe intal so report su la mobilitât sanitarie intal 2021. Lis regjons che a atrain plui pazients a son Emilie-Romagne, Lombardie e Venit. Cheste ultime e regjistre une licuidazion positive di 228 milions di euros. Lis regjons indulà che i citadins a migrin par curâsi inaltrò a son Calabrie, Campanie, Sicilie, Lazi, Pulie e Abruç.
“La mobilitât sanitarie – al comente Nino Cartabellotta, president de Fondazion Gimbe – e riflet lis grandis disavualancis inte ufierte di servizis sanitaris tra lis variis regjons. Cheste diference – par Cartabellotta – e je deventade une frature struturâl, destinade a jessi agravade de autonomie diferenziade”.
La Fondazion Gimbe e segnale ancje che in Italie plui di un euro su doi spindût par ricovars e prestazions specialistichis al finìs intes cassis di struturis privadis: il 54,6% dal totâl, a pet dal 45,4% dal public. In Friûl-Vignesie Julie lis struturis privadis a eroghin il 24,7% dal valôr totâl de mobilitât sanitarie ative. (a.d.g.) – 16.01.2024
