Cjatât muart a Davâr l’om lât a foncs

Al è stât cjatât tal dopomisdì di martars ai 18, di un elicotar des Vuardiis dal Fûc rivât di Vignesie, l’om di 84 agns sparît la dì prime dopo jessi lât a foncs. L’om al è sbrissât intun canalon, murint sul colp, e si podeve viodilu dal alt parcè che si cjatave intune largjure, a plui o mancul 700 metris di distance in linie di aiar dal puest là che al veve lassât la machine. Al jere plui o mancul a 1.100 metris di altitudin inte zone di Davâr, il so paîs di nassite, dulà che al passave diviers periodis dal an. Aes ricercjis a àn cjapât part 40 personis tra tecnics dal Socors Alpin, de Vuardie di Finance, des Vuardiis dal Fûc, de Forestâl e de Polizie municipâl. (A.I.) – 19.07.2023