Goletta Verde e à presentât cheste matine a S. Zorç di Noiâr i dâts sul monitorament des aghis de cueste dal Friûl-Vignesie Julie. Dai 10 ponts campionâts e analizâts, dome che un al risulte di là dai limits di leç. E je la fôs dal canâl in localitât Riul Canâl Fugnan a Mugle, che al finìs inte liste nere di Goletta Verde adiriture di 13 agns in ca. Il judizi di chest an al è “incuinât a fuart”.
Chei altris 9 ponts, 5 a mâr e 4 aes fôs di flums e canâi, a son stâts analizâts li di laboratoris specializâts e a son risultâts dentri dai limits di leç tant che l’an passât. Doi a son in provincie di Triest: il lît in localitât Barcola e chel in localitât Sistiane Castelreggio a Duìn-Nabresine.
Semafar vert, in provincie di Gurize, pai lîts di Marine Julia a Monfalcon, chel di Grau tra viâl dal Soreli e Vie Svevo, e la fôs dal flum Lusinç in localitât Punta Sdobba, simpri a Grau.
Cuatri i ponts analizâts in provincie di Udin: la fôs dal Stele a Prissinins, il scaric dal depuradôr a Lignan, il lît dal Lungomare Trieste ae crosere cun vie Gorizia a Lignan e la fôs dal Tiliment a Lignan Riviere.
Rivade ae edizion trentesime setime, Goletta Verde e controle il stât di salût des aghis marinis e des cuestis. “I risultâts saltats fûr dal control des aghis des nestris cuestis al conferme in Friûl-Vignesie Julie la tindince dal an passât – e precise Legambiente Triest. Intai ultins agns a son stâts inviâts e puartâts a tiermin i lavôrs pai implants di depurazion par cualchi struture, finide intai agns passâts sot procedure di infrazion di bande de Union Europeane. Il sfuarç dal pont di viste des infrastruturis al è stât, cumò al covente rimontâ ae font di intosseament dal Riul Cjanâl Fugnan” e conclût la associazion. (a.d.g.) – 10.08.2023
