Al jere deventât pardabon un brut sium pai students de sede di Borc Sant Antoni dal liceu Leopardi Maiorana, che tra Setembar e Otubar dal an passât a vevin fat variis denunziis par cualchi rapine patide. La Cuesture di Pordenon e je rivade a meti fin a chel brut sium, arestant un zovin di vincj agns, di origjins campanis, resident di agns inte capitâl dal Friûl ocidentâl. Lis investigazions puartadis indevant de Squadra volante de Cuesture di Pordenon a àn permetût di identificâ l’autôr di chescj fats, ancje in graciis dal aiût de Polizie Feroviarie.
Il modus operandi al jere simpri il stes. Lis vitimis, dongje de scuele, a vignivin svicinadis cu la scuse di domandâ pôcs minûts pal acuist di un biliet dal autobus; duncje, gafade la atenzion dal interlocutôr, l’agressôr, in mût violent, si imparonave dal tacuin dai fantats e dopo si deve ae fuide. In trê circostancis lis vitimis a àn ricognossût il lôr agressôr, che al è stât denunziât ae Procure di Pordenon. Al zovin i vegnin contestadis ancje dôs rapinis cometudis, simpri in dam di students, dongje de fermade dai autobus li de stazion feroviarie e, in dôs ocasions, li dal supermarcjât PAM di vie Garibaldi.
Il Pm Marco Faion al à domandât al Gip di Pordenon une ordenance di custodie cautelâr in preson fate ai 6 di Zenâr a Napoli, dulà che il zovin di vincj agns si cjatave dai nonos maternis. L’om al è stât puartât inte preson di Poggioreale. (a.d.g.) – 09.01.2024
