Li dal Malignani di Udin al è stât screât il gnûf laboratori MY DREAM LAB in presince dal dirigjent scolastic, Oliviero Barbieri, dai siei colaboradôrs, di une rapresentance dai docents di lenghe inglese, dal ex dirigjent scolastic Andrea Carletti e dal president de Fondazione Friuli, Giuseppe Morandini. Si è tratât di une inaugurazion-lezion: i students e lis studentessis presints a àn proponût e cjapât dentri i presints intune serie di ativitâts: dal kahoot aes riflessions, de conte de storie dal laboratori aes sôs prospetivis futuris. Dut mostrant lis potenzialitâts di ogni spazi singul dal laboratori.
Al è un spazi ae avanvuardie: flessibil, polifunzionâl, modulâr, cun pussibilitât di riorganizâ la disposizion su la base de ativitât in cors par favorî il coinvolziment dai arlêfs in ativitâts interativis. Bancs componibii, modui a gradons, postazions pai dibatits, lavagnis interativis e dispositfs portatii eletronics par ogni student simpri pronts al ûs, a son i tassei che a componin chest gnûf lûc di aprendiment. (a.d.g.) – 28.09.23
