“Un progjet di ampliament impuartant chel che al è stât ilustrât chest dopomisdì a Udin, de Fondazion Cjase de Imaculade di pre Emilio De Roja: al fevele di inclusion, formazion pes personis cun disabilitât, aiût concret pai oms e lis feminis che a vivin un stât di discomut e di dipendence”. A son lis peraulis dal assessôr ae Salût cun deleghis a disabilitât e politichis sociâls dal Friûl-Vignesie Julie, Riccardo Riccardi, che inte sede de Fondazion Cjase de Imaculade di pre Emilio De Roja, a Udin, al à cjapât part ae ilustrazion dal progjet di ampliament de struture, in presince dal arcivescul di Udin, bonsignôr Andrea Bruno Mazzocato e dal president de Fondazion Vittorino Boem.
Il progjet al previôt la realizazion di cualchi lozament pal acet dai minôrs, ancje forescj no acompagnâts, di fâ intai spazis verts esternis ae struture di vie Chisimaio. Un progjet che al domande un sfuarç economic di plui o mancul 5 milions di euros, 2,5 di chescj za intes disponibilitâts de Fondazion. (a.d.g.) – 18.09.23
