Al torne intes placis dal F-Vj “Un panettone per la vita”

“Un panettone per la vita”, la iniziative nadaline targade ADMO (Associazione donatori di midollo osseo), e torne intes placis dal Friûl-Vignesie Julie dai 25 di Novembar e fin ai 16 di Dicembar dal 2023. I volontaris a saran presints cun bancuts dulà che al sarà pussibil sielzi il propri regâl solidari: un paneton (o un pandoro) che, cemût che al dîs il sproc di chest an “O soi un tip dôs voltis bon” – a son dôs voltis bogns parcè che di là dal lôr gust inconfondibil a judin a cjapâ su fonts a poie des tantis ativitâts che la associazion e fâs sul teritori. “I volontaris presints intes placis de regjon a saran ancje chest an impegnâts intune racuelte dai fonts indispensabile pe buine riessude di dutis lis nestris ativitâts”, e à sclarît Paola Rugo, presidente de Admo dal F-Vj. Il rigjâf al sarà doprât pe gjestion organizative e aministrative di dutis lis ativitâts, pal acuist dai kit salivârs, la gjestion dai donadôrs, dai sanitaris e une vore di altris iniziativis necessariis par continuâ a informâ e sensibilizâ la popolazion su la impuartance dal don di medole ossie. Al sarà ancje atîf l’acuist in linie (su www.admo.it) dulà che si podarà sostignî la campagne sielzint i prodots di vê in maniere direte a cjase. Simpri sul portâl de associazion, al sarà pussibil fâ une donazion libare che e sarà inviade une e-card. (a.d.g.) – 27.11.2023