Tra il gnûf implant fotovoltaic e l’eficientament dal implant di iluminazion, al Polisportîf Bruseschi di Palme al sarà pussibil sparagnâ 68.792 kWh e almancul 15 mil euros ad an. I lavôrs a saran finanziâts di fonts regjonâi dal assessorât ae Difese dal ambient, Energjie e Disvilup sostignibil, par un totâl di 170 mil euros.
Luca Piani, assessôr comunâl ae Energjie: “l’intervent al garantirà un sparagn economic e energjetic impuartant pal Comun di Palme. O fasarìn moderni, sostignibil e eficient il sisteme di iluminazion des struturis sportivis, al viert e al sierât, doprant il soreli tant che font energjetiche”.
Il progjet al previôt la instalazion di un implant fotovoltaic di 20 kWh cun sisteme di cumul, la sostituzion de iluminazion esterne e interne, cu la sistemazion dai implants idrico-sanitari cun sîs gnûfs aparâts sanitaris cun casselis a dopli scarico. A chescj intervents si metarà dongje la instalazion di un sisteme di cumul energjetic di 20 kWh, a spesis dal Comun, che al permetarà di doprâ di sere e vie pe gnot la energjie prodote dilunc dal dì. (A.D.G.) – 2.01.2023