“Maman!” al torne su Telefriuli di vinars ai 9

Al mancje pôc par che al torni Maman!, la trasmission che di agns e compagne i plui piçui a scuvierzi la lenghe furlane doprant il zûc, la musiche, la fantasie e il divertiment. Un sucès che al va indenant tal timp e che si rinove cuntune stagjon plene di sorpresis, che a confermin Maman! tant che l’apontament par furlan dedicât ai fruts plui ricognossibil e cu la storie plui lungje. La date di segnâ sul calendari e je vinars ai 9 di Otubar, aes 6 e mieze di dopomisdì, cuant che Daria Miani cul so gjat Vigji e Desiree Chiappo Debegnach, la sô simpatiche “vicine di cjase”, a tornaran su Telefriuli (canâl 11) par screâ une gnove aventure. Fint in Jugn, Maman! al larà in onde ogni vinars cun replichis di domenie aes 7 di buinore e tal dopomisdì. Maman! al è il risultât di une coproduzion fra la ARLeF – Agjenzie regjonâl pe lenghe furlane e Telefriuli. Midiant dal zûc, de narazion e de scuvierte, ancje in cheste gnove stagjon Daria e Desiree a svicinaran i plui piçui al plurilinguisim, fasintju jentrâ in contat cul furlan in maniere naturâl e divertente, e dimostrant ai gjenitôrs i tancj vantaçs cognitîfs e comunicatîfs peâts al fat di cognossi plui lenghis za dai prins agns di vite. I ingredients di Maman! no cambiin, mantignint lis rubrichis plui amadis dal public. In “Fasìn un zûc”, i fruts a podaran provâ lis lôr cognossincis cun quiz, zûcs e induvinei, invezit “La cusine Bete” e proponarà ai plui piçui di zuiâ cul inglês e cul furlan par imparâ tantis peraulis intes dôs lenghis. A zuiâ cu lis lenghis, ma cheste volte cul furlan e cul todesc, e sarà ancje la piçule Corinna che e je a stâ a Stocarde cui siei gjenitôrs. Dopo de sô aparizion inte stagjon passade, che e à concuistât il public dai plui zovins e des mamis, e torne ancje Ketty, la protagoniste di une rubriche dedicade al sbelet. (A.I.) – 05.10.2026