Vile Manin cumò visitabile ancje di chei che no viodin

A Vile Manin, a Passarian di Codroip, si scree vuê, lunis ai 19, il gnûf panel informatîf visîf, di tocjâ e multimediâl. In graciis di chest strument multisensoriâl speciâl, ancje i visitadôrs cun disabilitât visive a podaran cognossi un edifici straordenari. Il panel multisensoriâl al è stât ideât e fat des associazions Lettura Agevolata di Vignesie e Tactile Vision di Turin inte suaze dal progjet “Vedere Villa Manin di Passariano”, curât dal Rotary. Il panel al pues jessi doprât dal visitadôr, sedi chel che al viôt e sedi chel cun disabilitât visive, facilitantlu intal orientament e furnintji lis primis buinis informazions su lis modalitâts di visite e i servizis ufierts. Ae rapresentazion visive e tatile di ogni element si metin dongje dôs vuidis audiovideo (talian e inglese), ativabilis cun facilitât cun codiçs QR o tag NFC, che a furnissin une prime curte descrizion dai spazis e di ce che si è daûr a visitâ. (A.I.) – 19.06.2023