Tra culture e tradizion Pasche e Lunis di Pasche a saran plens di iniziativis a Cividât. Domenie ai 9 e lunis ai 10 di Avrîl, in ocasion des dôs fiestis, al torne inte Citât ducâl l’apontament par residents e visitadôrs cul antîc “Zûc dal Truc”.
Il Truc, par cure de Pro Loco, dai varis Borcs citadins e dal Comun, al sarà disponibil in place Paolo Diacono, in place Foro Giulio Cesare, in place San Pietro, li de plaçute Santo Stefano a Rualis, dongje il centri ricreatîf di Cjararie e dongje la ex scuele materne di Grupignan. In cheste ultime localitât, des dôs dopomisdì al crepuscul e sarà presinte ancje la mostre “Viaggio tra pizzi, ricami e ceramiche di un tempo”, par cure de Associazion Amîs di Grupignan. In plui, lunis di Pasche, in place Duomo e in plaçâl Boiani, des 9 aes 19 si tignarà il marcjadut di articui manuâi e distribuzion di ûfs colorâts par cure de APS Arte cuore e passione.
A son tantis lis altris oportunitâts culturâls e turistichis previodudis intai doi dîs des fiestis di Pasche, che a permetaran esperiencis unichis pai turiscj presints in citât. A saran vierts e visitabii ducj i museus e i lûcs de culture citadins, cussì tant che dutis lis glesiis.
Rose ae asule e je la esposizion dal Sant Jaroni di Tiziano Vecellio, opare ospit di ecezion dentri de Colezion de Galarie Famee De Martiis a Palaç de Nordis, vierte al public cun orari continuât 10-18.
Viert ancje il Munistîr di Sante Marie in Val cul Templut langobart, a disposizion cun orari continuât des dîs de matine aes sîs di sere; puartis viertis ancje pal Museu Archeologjic Nazionâl (orari 10-19), dulà che al sarà ancje pussibil visitâ la grande mostre dedicade ae ete di mieç furlane Feudataris, cavalîrs e crosâts. Il cjistiel dai siôrs di Attems intal Friûl patriarcjâl e il Museu Cristian e Tesaur dal Domo (orari 11-18), che al permetarà di imerzisi in percors sugjestîfs ae scuvierte des lidrîs de citât. Cun orari continuât des 10 aes 18, si podarà visitâ il Centri Internazionâl Vittorio Podrecca – Teatri des Maraveis Maria Signorelli, dulà podê amirâ la colezion straordenarie di marionetis. Il Museu de Vuere Grande al acetarà il public des 9 aes 12 e des 15 aes 18. Vierte intes dôs zornadis festivis ancje la Cjase Medievâl cun orari 10-13 e 15-19. Infin dongje la Glesie di Sante Marie dai Batûts al sarà pussibil visitâ la mostre “Femmine d’acqua fra mediterraneo e Mitteleuropa”, dulà che a son esponudis lis oparis di piture e sculture fatis dal artist trevisan Luciano Longo.
Par detais e informazions, al è pussibil contatâ Informacittà in Place Domo 5, che al restarà viert al public in dutis i dôs lis zornadis. Par contats telefonics, si pues clamâ il numar 0432/710460 o contatâ il sportel ae direzion di pueste eletroniche informacitta@cividale.net. (A.D.G.) – 07.04.2023
