In zîr pal Friûl cul bus dai savôrs

Cividât, Manzan e Nimis a son lis prossimis tapis di “SaporiBus nel Friuli Orientale”, la coriere turistiche inmaneade dal Consorzi fra lis Pro Loco Torre Natisone – Tor Nadisôn – Ter Nediža, une novitât di chest Istât par promovi la valorizazion turistiche dal teritori, cun gustâ e visitis a aziendis agriculis e vitiviniculis, distilariis… I zîrs a son in program par trê domeniis une daûr di chê altre: ai 27 di Avost, ai 3 e ai 10 di Setembar. Domenie ai 27, il pulmin al puartarà i turiscj a Cividât par une cjaminade tra i bancuts dal marcjadut di anticuariât, par gustâ, visitâ il Templut langobart e chel dal Domo. La prossime jessude in bus e sarà di Udin a Manzan, cun visite vuidade ae Badie di Rosacis e ae aziende Schianchi; la ultime e puartarà i visitadôrs ae antighe sagre “des campanelis” di Nimis. (A.I.) – 22.08.2023