Pereyra al à dit di sì: al torne a Udin dopo un Istât… di bessôl

De fin di Jugn, cuant che al jere scjadût il so contrat cun l’Udin, si alenave di bessôl sui cjamps dal Donatello, in citât. A son volûts cuasi trê mês par tornâ a viodi in maie blancje e nere Roberto Pereyra, il cjapitani de ultime stagjon e il zuiadôr plui tecnic e di esperience, intune cun Deulofeu. Nassût intal ’91, il ‘Tucu’ al è stât puartât in Italie da Pozzo, zuiant 84 partidis (e segnant 8 gol) a Udin, daspò al è lât a zuiâ pe Juve (48 partidis), al Watford (106) e dal 2020 al jere tornât di gnûf in blanc e neri, dulà che inte sô seconde aventure al à zuiât 92 voltis e segnât 13 gol. Lu voleve l’Inter, lu voleve la Samp (in B), lu volevin in Brasîl e ancje in Arabie, ma tal ultin al à acetât un contrat di un an cu la scuadre che al cognòs miôr. E che e à cetante dibisugne di lui! (A.I.) – 11.09.2023