La “Europeada 2028” di balon in F-Vj e tache cuntune firme a Triest

Al vignarà firmât martars ai 2 di Setembar il statût de associazion temporanie che e varà di inmaneâ la “Europeada 2028”, il campionât european di balon des minorancis linguistichis. Aes 10.30 di buinore, inte sale multimediâl dal Palaç de Regjon a Triest, te Place de Unitât de Italie, ae presince dal assessôr regjonâl aes autonomiis locâls Pierpaolo Roberti, i rapresentants des cinc istituzions che a rapresentin lis minorancis furlane e slovene a firmaran l’acuardi: la Confederazion des Organizazions Slovenis, la Union Culturâl Economiche Slovene e la Union des associazions sportivis slovenis in Italie pe minorance slovene e la Societât Filologjiche Furlane adun cu la Associazion Sportive Furlane pe comunitât linguistiche furlane. Il campionât european di balon des minorancis e je une manifestazion promovude dal FUEN, la Union Federâl de minorancis europeanis. La prossime edizion, tal 2028, si davuelzarà propit in Friûl-Vignesie Julie, jenfri la fin dal mês di Jugn e il principi di Lui. L’acuardi des istituzions furlanis cun chês slovenis al è duncje l’at formâl di costituzion de associazion che e varà di inmaneâ l’event, li che a parteciparan scuadris masculinis e femininis di dute Europe. (A.I.) – 01.09.2025