144
La Apu Old Wild West di Udin e vinç il so secont derby in cjase cu la Ueb Gesteco di Cividât (tignint cont ancje de Supercope), dopo la disfate dure in trasfierte inte partide de prime part dal campionât di A2 di bale tal zei. La vitorie al Carnera e je ancjemò plui impuartante, parcè che e je rivade intal piês moment di dute la stagjon de scuadre di Udin, cun tancj zuiadôrs che no son a disposizion dal alenadôr Finetti e in pratiche cence plui americans. Il risultât finâl di 73-66 par Udin al è rivât tal ultin di une partide zuiade cun braùre dai parons di cjase, che a àn ‘sintût’ dut il pês dal moment dificil. Massime Monaldi e Gaspardo, autôrs un di 26 e chel altri di 16 ponts. (A.I.) – 06.03.2023
