A Claut si siere la stagjon dal schi

Domenie ai 7, i amants de mont e dal schialpinisim a saludaran la stagjon invernâl cuntune zornade di fieste a Claut: la trentesime tierce edizion dal radun schialpinistic dal Pradut. In concomitance, si celebrarà ancje il vincjesim otâf “Memorial Giancarlo Martini, in ricuart di une figure storiche de dissipline. Claut al è une vere e proprie scune dal schialpinisim: di là di atirâ centenârs di apassionâts, la piçule localitât dal cjanâl de Ciline e je il lûc di nassite de campionesse mondiâl Mara Martini. Il radun, che al viôt ogni an la partecipazion di schiadôrs e apassionâts di diviersis regjons, al tacarà aes 7.30 di buinore. (A.I.) – 06.04.2024