A Dartigne l’ultin disc dai Braul: une storie leterarie dal Friûl

Vinars ai 10 di Mai, in ocasion de Setemane de Culture Furlane, tal teatri Lavaroni di Dartigne i Braul a presentin il lôr ultin album “Barlums-Canti d’inchiostro”. I Braul a son une des formazions plui ‘vecjis’ de gnove musiche furlane, nassude tal 1993 te zone jenfri Davian e Montreâl. Di subite, a son stâts un dai grups plui atîfs te rivisitazion e inovazion de musiche tradizionâl furlane dal ambit folk. In passe 30 agns di ativitât, a son stâts invidâts a cetantis rassegnis in Italie e tal forest, a àn publicât in dut cuatri discs, tant preseâts dal public di passionâts, soredut parcè che la lôr musiche no je “filologjiche”, ma e vûl proponi alc di gnûf stant su lidrîs antighis, cun lengaçs diferents. Il gnûf lavôr jessût par Folkest Dischi, tacât bielzà tal 2020, al è un ‘concept album’, cun nûf composizions di folk di autôr. Ognidune e je nassude di un libri che al conte lûcs, fats e personis de storie valutade ‘piçule’ dal Friûl e dai furlans, ma che a son impuartants par rivâ a capî une vore di avigniments de ‘grande’ storie culturâl dal Friûl. (A.I.) – 09.05.2024