Une pianiste cetant preseade dal public di Udin

La stagjon dai concierts de Academie dai Studis dal Piano “Antonio Ricci”, direte di Flavia Brunetto, e torne a scomençâ dopo la polse pes fiestis. La seconde part dal program e tache sabide ai 10, aes cinc e mieze di dopomisdì, cuntun conciert de pianiste Anna Kravtchenko, vincidore dal preseât Concors “Busoni” e cetant preseade dal public di Udin. L’event, programât tal Palaç Antonini, sede da Universitât di Udin, al sarà dut dedicât ae grande tradizion romantiche dal piano: Schumann, Liszt e Schuber. Anna Kravtchenko, citadine taliane nassude in Ucraine, e à vinçût il so prin premi cuant che e veve dome 16 agns e e à sunât pes plui grandis istituzions musicâls europeanis te sô cariere, afermantsi su la sene internazionâl. (A.I.) – 09.01.2026