Une grande pianiste russe a Udin pe prime volte

Al è dedicât dal dut al romanticisim di Chopin e Liszt il gnûf apontament de Stagjon di musiche dal Teatri Gnûf “Giovanni da Udine” firmade dal diretôr artistic Paolo Cascio. Joibe ai 3, il palc al sarà di fat dut di Yulianna Avdeeva, pianiste di caratar straordenari che e à concuistât la atenzion dal public e de critiche vincint il prestigjôs concors “Chopin” di Varsavie intal 2010. La prime femine a trionfâ alì in 45 agns dopo Martha Argerich, Yulianna Avdeeva e à publicât discs di sucès cun pagjinis di Bach, Mozart, Schubert, Prokof’ev, Chopin e Liszt. E propit a chescj ultins doi compositôrs al è dedicât il program sielt de pianiste russe pe sô prime esibizion a Udin. (A.I.) – 02.04.2025