Il parc Moretti di Udin al torne a jessi un grant spazi di incuintri, di creativitât e maravee. Di vinars ai 12 e fint ai 21 di Jugn, il cûr vert de citât al torne a impiâsi cu la rassegne “Terminal”, inmaneade dal Circo all’inCirca cu la cooperative Puntozero, instreçant circ contemporani, musiche, laboratoris, spetacui, danze, incuintris e cetant altri, par un program siôr e internazionâl pal public di dutis lis etâts. Dongje dal solit tendon fucsie e zâl, pal secont fin de setemane al sarà tirât su un secont tendon par da acet ai 60 professioniscj di dute la Europe, ospits a Udin di “Basque Street Arts Italia”. E ducj chei altris protagoniscj di une rassegne che e fevelarà di “confins” ancje cun artiscj che a rivin dal forest. I spetacui che a saran presentâts a son cuasi ducj in prime nazionâl: “Queen of Saba”, 15feet6, Company Midnight, Sawdust Symphony, Palestinian Circus… La decime edizion de rassegne e met adun come simpri grancj events e piçulis ativitâts par ducj: laboratoris, leturis, incuintris par imparâ arts e dissiplinis diferentis. Dongje dai spetacui sot dal tendon tal viert a saran presentâts ancje events “coletîfs: par esempli, il conciert dai 50 elements de Orquestra de malabares. (A.I.) – 11.06.2026
Foto di J. Harnischmacher
