Al è timp fint ai 30 di Avrîl dal 2024 par candidâsi par “Suns Europe”: il festival des arts intes lenghis minorizadis de Europe inmaneât de cooperative Informazione Friulana, editore di Radio Onde Furlane, cu la poie finanziarie de Regjon e de ARLeF – Agjenzie Regjonâl pe Lenghe Furlane, e cu la colaborazion di diviers sogjets publics e privâts, di chenti e internazionâi. Il Festival, che chest an al finìs 10 agns, si davuelzarà a Udin e in altris lûcs dal Friûl vie pal mês di Otubar. Il bant al è centrât su la sezion musicâl de manifestazion e si indrece a grups e musiciscj cuntune produzion artistiche fate intune des lenghis espression des comunitâts minorizadis de Europe. Par candidâsi, i artiscj a àn di compilâ il modul che al è te sezion di pueste dal sît www.sunseurope.com compagnantlu cui materiâi domandâts. La selezion e sarà fate po dai organizadôrs dentri dai 30 di Mai dal 2024 e comunicade a cui che al à partecipât par pueste eletroniche. I artiscj selezionâts a saran invidâts a cjapâ part al festival par sunâ dal vîf lis lôr cjançons vie pe serade finâl dal festival, che si davuelzarà vie pal mês di Otubar dal 2024 a Udin. Dut câs, la organizazion e cirarà di dâur ai artiscj la pussibilitât di presentâ la lôr produzion musicâl ancje in altris moments de manifestazion. (A.I.) – 24.04.2024
Foto di L. Chiandoni