Spetacui itinerants sui trois dal Cjars

Ancje chest an e torne “Contaminazioni Digitali”, la rassegne multidissiplinâr promovude dal Comun di Turiac. Inte setime edizion, la prime tape e je proviodude intal cûr dal Cjars e dal Lusinç (ai 24 e ai 25 di Jugn), cuntune programazion di spetacui itinerants par po movisi a Turiac (dai 29 di Jugn ai 2 di Lui) cuntun calendari fat di spetacui, proiezions e danze contemporanie, che a valorizaran e a contaran il patrimoni culturâl materiâl e imateriâl dal teritori. A vierzi cheste edizion al sarà il duet acquasumARTE, cuntun cjamin multimediâl cun scufis e tablet, che di S. Martin dal Cjars al larà sù sul S. Michêl, compagnant il public tra i lûcs de Vuere grande, imerzûts tra memoriis, tescj poetics e paisaçs sonôrs. Il dì dopo al sarà pussibil gjoldisi “Sorpassare”, une cjaminade cu la danze dilunc dai trois dal Monte Sei Busi. (A.I.) – 22.06.2023