Sollima e la orchestre intun conciert dedicât a Vignesie

Al à sunât un violoncel fat di glace, al è metût su une orchestre cun cent sunadôrs di violoncel e al è il compositôr talian contemporani plui sunât tal mont. Tal teatri “Verdi” di Pordenon al torne miercus ai 7 di Mai l’ecletic e visionari Giovanni Sollima, sul palc par un viaç tal segn de contaminazion di gjenars diferents. Adun cul violinist Federico Guglielmo e la orchestre “Il Pomo d’Oro” al sunarà “Al-Bunduqiyya – Il Conciert Pierdût”, dedicât ae Vignesie (la prime peraule arabe dal titul) dal decim otâf secul. In program, fruçons di musichis di Tartini, Vivaldi e dal stes Sollima, voltâts intun incuintri jenfri classic e contemporani. (A.I.) – 06.05.2025