Mittelfest, il belanç positîf al jere ‘Inevitabil’

Mittelfest 2023 al à sierât il sipari su la trentesime seconde edizion dal festival che, cundut dal meteo no simpri biel, al à dât acet a un public pardabon numerôs, che al à rispuindût a colp ae sfide dal “Inevitabil”, il teme di chest an. Di là dal dât teritoriâl positîf, Mittelfest al continue a sburtâ Cividât e dute la regjon intal sisteme dal spetacul dal vîf internazionâl, riclamant spetatôrs di di là dal confin e tignint fede ae sô vocazion origjinarie. Inte conference stampe di sierade, a son stâts metûts in struc i dâts: passe 30 progjets artistics, cun 14 primis assoludis o nazionâls, 250 artiscj a Cividât e il 71% di ocupazion medie pai spetacui. Cuntune novitât che e fâs ben sperâ pe edizion dal an che al ven, dai 19 ai 28 di Lui dal 2024: la cressite dal public inte fasse dai 20 ai 35 agns. (A.I.) – 01.08.2023