La prime vision nazionâl di “Gli stessi”, la gnove creazion dal Circo all’inCirca di Udin, si davuelzarà vinars ai 22 aes 7 e mieze sot sere tal Teatri gnûf “Giovanni da Udine”. Il spetacul al cumbine il circ contemporani e il teatri fisic intune esperience imersive che e messede acrobazie, ilusionisim teatrâl, moviment e dramaturgjie visuâl. Il progjet al ven fûr di une idee dal diretôr artistic dal Circo All’inCirca, Davide Perissutti, che al disvilupe une riflession ironiche sore i concets di incrosament, identitât e confins. Il regjist Roberto Magro, un dai plui impuartants educadôrs e regjiscj dal circ european, al tradûs i temis in imagjins senichis inspiradis al realisim magjic e ae ironie malinconiche dal regjist Otar Iosseliani. Sul palc di sene, cuatri personaçs che a somein compagns e che a son intun spazi sospindût tal timp, jenfri mieç di puartis in moviment, ogjets che a mudin e prospetivis instabilis. (A.I.) – 21.05.2026
Foto di L. Ficetti
