Il cine ‘pierdût’ gjavât di un test di Ciconi

Inte suaze de Setemane de Culture furlane de Societât Filologjiche Furlane, si rinove ancje chest an l’apontament cu la Cineteca del Friuli, che sabide ai 20 di Mai, aes 6.30 dal dopomisdì, al Cinema Sociale di Glemone, in colaborazion cu la rassegne “Leggermente” di S. Denêl, e presente il cine “La statua vivente” (1943) di Camillo Mastrocinque. La pelicule, gjavade di “La statua di carne”, drame teatrâl dal poete, gjornalist e dramaturc sandenelin Teobaldo Ciconi (1824-1863), par agnorums e je stade crodude pierdude, e po dopo cjatade fûr cualchi an indaûr in Americhe Latine in graciis des ricercjis de Cineteca, che le à restaurade cu la poie dal Ministeri. Il cine al è stât zirât in plene Seconde vuere mondiâl a Triest, dulà che e jere nassude ancje la protagoniste, Laura Solari. (A.I.) – 18.05.2023