FVG Orchestra: prime te graduatorie dal Ministeri de Culture

La FVG Orchestra (Istituzion Musicâl e Sinfoniche dal Friûl-Vignesie Julie) e à otignût il prin puest te graduatorie nazionâl des orchestris regjonâls fate dal Ministeri de Culture pal 2026: un risultât che al conferme la cressite de sinfoniche regjonâl e al consolide la sô presince inte sene taliane. Il decret al assegne ae Orchestre une votazion di 68,01, che e vûl dî une incressite dai finanziaments ministeriâi pes sôs ativitâts di chest an. I ponts otignûts te component de cualitât a son une vore impuartants, 21 su 35, cu la votazion plui alte (6/6) sedi pe professionalitât dal personâl, sedi pe cualitât artistiche e pe inovazion dal progjet. “Jessi i prins in Italie jenfri lis orchestris regjonâls al è un risultât che nus dâ cetante sodisfazion ma soredut nus cjarie di ancjetante responsabilitât – al è il coment dal president Paolo Petiziol e dal diretôr artistic Claudio Mansutti – O sin tal secont an di un procès che al larà indevant par trê, e chescj numars a confermin che o sin te direzion juste: il Ministeri al ricognòs ancjemò une volte la cualitât dai nestris musiciscj e la soliditât dal nestri progjet artistic. Cumò o vin voie di confermâ la nestre posizion e, cul lavôr di dute la scuadre, di continuâ a cressi a nivel nazionâl. Chest risultât al rive tal secont an di un procès di valutazion di trê che, se al ven confermât, al puartarès la FVG Orchestra a otignî il ricognossiment di Istituzion Conciertistiche Orchestrâl (ICO), la categorie plui prestigjose dal sisteme di spetacul dal vîf in Italie. Intant, tes setemanis che a vignaran, la orchestre e presentarà une schirie di events, di Cividât (vinars ai 26 tal Bosc Romagn par un omaç a Domenico Modugno cu la vôs di Peppe Voltarelli) a Mueç, e di S. Vît dal Tiliment a Udin. (A.I.) – 23.06.2026