Folkest al tache cun dôs liendis de Sardegne

Dopo lis anteprimis dal ultin fin de setemane, la cuarantesime cuinte edizion di Folkest, la rassegne di musiche internazionâl, e tache vuê in vie uficiâl, joibe ai 15 aes 9 di sere a Cjampfuarmit intal Parc de ex scuele elementâr. Sul palc i Trival, un tercet formât di Veronica Urban, Alvise Nodale e Luca Boschetti che al propon une rileture de tradizion furlane cun ecos irlandês, musiche rock e fingerstyle. Po dopo, doi esponents grandonons de musiche di tradizion sarde: Mauro Palmas e Luigi Lai, vere liende de musiche de Sardegne e sunadôr straordenari des launeddas. Vinars ai 16, dopli apontament: a Prepot Sacred Woods, il progjet di folk ‘pagan’ e ‘scûr’ di Arthuan Rebis, e a Vît, Jaime Michaels e Pauli Ercoli. (A.I.) – 15.06.2023