Culture e turisim cun “Carniarmonie”

A saran 36 i concierts in 27 comuns de mont pe trentesime seconde edizion di “Carniarmonie”, il festival inmaneât de Fondazione Bon. Une manifestazion storiche buine di cumbinâ, prime tra dutis, musiche, turisim, benstâ e atenzion pe nature, ma ancje une ufierte culturâl che e potenzie la stagjon turistiche de mont furlane. Dopo vê screât spazis inesplorâts, in plui di trente agns di ativitât, e vê pandût cognossincis no dome musicâls, la rassegne e à ancje chest an une programazion siore che e cjape dentri no dome dute la Cjargne, ma ancje la Val Cjanâl e il Cjanâl dal Fier. Si scomence domenie ai 2 di Lui a Soclêf cul violoncelist Mario Brunello adun cu la FVG Orchestra e fint ai 3 di Setembar a son previodûts concierts di classiche, jazz e tant altri, cun ospits ancje nazionâi e internazionâi. (A.I.) – 27.06.2023