Bachete mondiâl pai Amîs de Musiche di Udin

Il conciert finâl dal 2025 pe centesime cuarte stagjon dai Amîs de Musiche di Udin al previôt une stele: il diretôr Ernest Hoetzl, il mestri vienês che, dal teatri “La Scala” di Milan fint ae Filarmoniche di Berlin, de Asie aes Americhis, al à diret passe otante orchestris in dut il mont. Martars ai 2, Hoetzl al larà sù sul palc tal teatri Palamostre (daûr tradizion, scomençant aes 7:22 sot sere) cu la EURO Symphony SFK Orchestra, nassude di une colaborazion jenfri Slovenie, Friûl e Carinzie par intensificâ la cooperazion culturâl jenfri lis regjons, che tai agns si è dedicade a un repertori simpri plui grant. Pe serade dal conciert a Udin al è stât sielzût un program monografic dal titul “Mostly Mozart”, plui che altri Mozart, cul violinist turc Cihat Aşkın che al sarà il solist suntun strument dal 1846 di Jean Baptiste Vuillaume. (A.I.) – 01.12.2025