A Udin un dai miôr pianiscj internazionâi

Musiche di cjamare ancjemò in prin plan pe stagjon n. 101 dai Amîs de musiche di Udin. Dopo il conciert cul prin clarinet de Orchestra della Radio di Zurigo, vinars ai 2, aes 5 dopomisdì, in Sala Aiace a Udin al rive un dai pianiscj internazionâi plui innomenâts, Philippe Entremont. Cun lui, la conciertiste furlane – e presidente dal sodalizi – Luisa Sello, che a colaborin insiemi aromai di dîs agns, par un program dut francês, cu lis oparis mestris di Saint Saens, Poulenc e Debussy, ma ancje oparis mancul cognossudis. Tal conciert al sarà ancje presentade la ultime regjistrazion discografiche dal duet, il gnûf Cd “French Music with Flute”. (A.I.) – 01.12.2022