Il pianist e compositôr di Pordenon, Remo Anzovino, al à celebrât la Fieste de musiche sunant pai oms e pes feminis detignûts inte preson di Poggioreale, a Napoli. Inte Glesie de preson, dulà che plui o mancul trente agns indaûr al veve sunât Pino Daniele, Anzovino al à presentât par une ore i tocs dal so gnûf disc “Don’t Forget to Fly”, rivant a alçâ sù la platee traviers la sô fantasie e i siei sunôrs viers une dimension di bielece totâl. Cence bisugne di peraulis, dome cu lis sôs composizions, Remo al à savût fevelâ al cûr dai detignûts, vint une ovazion comovente cuntun batiman di diviers minûts. Tra i presints, il diretôr de preson Carlo Berdini e il garant campan dai presonîrs, Samuele Ciambriello, che al à comentât: “Al è stât un conciert di no podê dismenteâ, une ore magjiche”, intant che Anzovino al à fevelât di “une esperience, chê di puartâ la mê musiche par cui che nol à vôs e al vîf sierât, che o puartarai a lunc intal gno cûr”. (A.I.) – 21.06.2023
103
