Vie pe buinore di vuê, inte sale di rapresentance plene di int dal Comant Legjon Carabinîrs “Friûl-Vignesie Julie”, il Gjen. B. Francesco Atzeni, Comandant de Legjon, al à ilustrât ae stampe e ai ospits intervignûts il Calendari Storic de Arme dai Carabinîrs 2024 in lenghe furlane, realizât in colaborazion cu la Agjenzie regjonâl pe lenghe furlane (ARLeF).
Pal secont an, di fat, la Benemerita, di simpri une presince costante fint intai borcs plui dispierdûts dal Stât talian, e à volût promovi la edizion dal so tradizionâl Calendari Storic in lenghe furlane, lenghe ricognossude, cu la leç 482/99, “minorance storiche linguistiche” e fevelade, soredut, intes provinciis di Udin, Pordenon e Gurize.
Il “Calendari storic de Arme dai Carabinîrs 2024” in lenghe furlane, che si zonte a chês altris 9 lenghis (inglês, francês, todesc, spagnûl, portughês, gjaponês, cinês, arap e sart) che al è stât voltât chest calendari innomenât, al è dedicât al teme “I Carabinîrs e lis Comunitâts” e, in particolâr, ae figure dal Carabinîr tant che pont di riferiment de coletivitât. La vicinance, la capacitât di contat e di scolte, lis tantis atenzions, piçulis e grandis, ai bisugns des personis, des citâts metropolitanis fint ai borcs plui lontans di provincie, là che i Carabinîrs a rispuindin aes istancis particolârs di confuart sociâl di ogni comunitât, a son il fîl ros che al caraterize di simpri il lavôr de Arme e che nus acompagne par dutis lis 12 contis dal Calendari 2024.
Lis storiis, descritis de pene di Gramellini, a contin, cun figurazions realizadis dal Studio Design Pininfarina, cualchidune des impresis plui eroichis – tant che il sacrifici cussient capitât a Fiesole – e altris che a àn plui a ce fâ cu la vite di ogni dì – tant che il jutori aes personis plui fragjilis inte cuotidianitât o tal câs di avigniments straordenaris tant che la pandemie di Covid-19.
Intal so intervent, il Comandant de Legjon al à rimarcât cemût che la edizion dal Calendari in lenghe furlane “nol è dome une iniziative editoriâl e un fat di culture ma al rapresente un moment di vicinance concrete al teritori e ae sô popolazion”.
“Chel di vuê al è un grant avigniment che si concretize pe seconde volte e no podìn che jessi contents. La colaborazion rinovade cu la Arme, pe version in lenghe furlane dal Calendari Storic dai Carabinîrs, e fisse ancjemò une volte la impuartance dal furlan sul nestri teritori. Lis prenotazions de edizion dal 2024 de version in marilenghe a son stadis une vore altis, ancje difûr dai confins dal Friûl. Si che duncje, l’auguri al è che cheste e deventi, intai prossims agns, une vere tradizion che o crôt che e vedi za fondis saldis. Chest al significarès, pe lenghe furlane, jentrâ a plen titul intune des istituzions plui amadis, ma soredut ricognossudis a nivel internazionâl”, al à declarât Eros Cisilino, president de ARLeF – Agjenzie regjonâl pe lenghe furlane.
La presentazion e je lade indevant cui intervents dal President dal Consei Regjonâl Mauro Bordin, dal Vicepresident de Regjon F-Vj Mario Anzil, dal Conseîr dal Fogolâr Furlan di Rome e de Senadore Francesca Tubetti che intes lôr peraulis di salût a àn marcât il leam che di simpri al met adun la tiere furlane ae Arme dai Carabinîrs e la impuartance di mantignî vive la lenghe furlane, testemoneance de sô ereditât culturâl e storiche.
Tra lis autoritâts presintis al jere il Prefet di Udin, Domenico Lione, il Gjen. C.A. Luigi Federici, Comandant emerit de Arme dai Carabinîrs, il Gjen. C.A. Michele Cristoforo Ladislao, Ispetôr de Associazion Nazionâl Carabinîrs F-Vj, e ancje i rapresentants massims des associazions di categorie dal mont imprenditoriâl furlan. (a.d.g.) – 18.12.2023
