La Ministre dal Lavôr e des Politichis sociâls Marina Elvira Calderone vuê a Udin e à anunziât che e je daûr a lavorâ al proviodiment intune cu la coleghe Valditara.
A dâi acet cheste matine in Sale Valduga a Udin, il president de Cjamare di Cumierç Giovanni Da Pozzo. “La Italie e in particolâr il Friûl-Vignesie Julie a àn invertît lis previsions su la recession e a son rivâts a cressi, cundut des complessitâts cognossudis dal moment. Il Paîs al à però bisugne di rinovâsi e di riformis, tacant dal fisc e dal lavôr, ancje par rispuindi ae velocitât che la inovazion e je daûr a cambiâ lis vitis di ducj. Al incuintri cun categoriis economichis, impresis e ordins professionâi inte sede de Cjamare, a jerin presints ancje l’onorevul (e president de Comission Lavôr) Walter Rizzetto, il sindic di Udin Pietro Fontanini e l’assessôr regjonâl al Lavôr Alessia Rosolen.
La Ministre Calderone e à confermât la volontât di meti man “a normis dispès scritis mâl e in mût complès. O vin di costruî un Paîs plui sempliç – e à ribatût la Ministre – cun normis comprensibilis cun facilitât e aplicabilis. Intal panorame dai incentîfs pes assunzions, par esempli, la semplicitât nus judarès a no straçâ risorsis e a no penalizâ tipologjiis contratuâls, come il garzonât, che al varès di jessi l’acès principâl al mont dal lavôr: però al risulte dificil disberdeâsi intal grum di normis”. La Ministre e à visât dopo che “la peraule flessibilitât no va doprade tant che sinonim di precarietât se lis normis a vegnin rispietadis: no crôt – e à dit – che il contrat a tiermin al sedi element di precarizazion, ma se gjestît in maniere oportune al pues deventâ strument pal consolidament dal rapuart di lavôr”. Sul teme de sigurece, e à visât che “adun cu la coleghe Valditara o stin studiant une cuviertidure assicurative pai students des superiôrs par dutis lis ativitâts fatis in ambit scolastic e extrascolastic e dopo une formazion in culture de sigurece, parcè che ancje la alternance e puedi jessi fate in mût miôr: al è impuartant che, in sigurece, i zovins a incuintrin la imprese e a cognossin cemût e dulà che si lavore”. (A.D.G.) – 27.03.2023
