La Rai cemût spindie pardabon i bêçs stanziâts dal Stât talian inte suaze de convenzion pe tutele dal furlan? E soredut, nol saressial il câs che la Zonte regjonâl e la presidence dal Consei Regjonâl, par rivâ a gnûfs acuardis, a agjissin passant la riproposizion semplice de convenzion di cumò in jessi tra Stât e Rai?
A son lis dôs domandis che al fâs Markus Maurmair, president de seconde Comission regjonâl consiliâr inte sô interogazion presentade vuê in ocasion de Zornade Europeane des Lenghis. “Vuê e je la Zornade Europeane des Lenghis – al scrîf il conseîr regjonâl di Fratelli d’Italia – che si met in evidence tant che une des ricjecis plui grandis de Europe, di protezi, di promovi e di vivi la varietât des espressions linguistichis presinte intal Continent vieri. Inte Union europeane si contin 24 lenghis uficiâls (bulgar, cec, cravuat, danês, eston, finlandês, francês, grêc, inglês, irlandês, talian, leton, lituan, maltês, olandês, polac, portughês, rumen, slovac, sloven, spagnûl, svedês, todesc e ongjarês) e plui di 60 lenghis autoctonis regjonâls o minoritariis, feveladis di plui o mancul 40 milions di personis, ce il catalan, il basc, il frison, lis lenghis sami, il galês e l’yiddish”.
“Dut chest premetût, al è di visâsi – al sotlinee Maurmair – che tra lis garanziis contempladis cu la atuazion de leç 482 dal 1999, norme che e regole la difese des minorancis linguistichis, e je previodude la organizazion di un servizi radiotelevisîf in lenghe minoritarie e che cheste disposizion e cjate atuazion parziâl ancje in Friûl-Vignesie Julie traviers di dôs convenzions specifichis sotscritis tra il Guvier e la Rai. O scuen sotlineâ che intes setemanis prossimis lis citadis convenzions, che a previodin fonts dal Stât a pro de radiotelevision publiche par difindi e promovi la lenghe furlane e chê slovene inte programazion televisive e radiofoniche plui di furnî une programazion in lenghe taliane regjonâl a front de specificitât culturâl e storiche de Regjon, a varan di jessi rinovadis partint di ce che al jere scrit intal acuardi precedent cuntun milion di euros destinât ae lenghe furlane e 11,6 milions di euros pal sloven e il talian”.
“E viodût che che intai acuardis precedents la Regjon Friûl-Vignesie Julie e à vût un rûl incisîf a pro dal aument des risorsis destinadis al ûs de lenghe furlane cuntun passaç intai varis rinovaments fats intai ultins 5 agns di 200 mil a un milion di euros o ricuardi che tra i supuarts principâi vûts in cheste azion di difese de Regjon e je la azion de Assemblee Linguistiche Furlane che a vuê e da dongje plui di 140 Comuns “.
“Dut câs o ai di evidenziâ – al declare il conseîr – che une part des risorsis assegnadis dal Stât a pro de valorizazion des lenghis minoritariis, traviers la azion de RAI, al è erodût in maniere implicite dal coinvolziment di societât dal stes grup radiotelevisîf, tant che RAI.COM, che par gjestî i fonts a mandin fûr une proprie parcele che e pues rivâ al 15 par cent dal impuart destinât, gjavantlu in maniere implicite aes iniziativis che par chês a son stadis assegnadis. La mancjade assegnazion ae sede dai fonts stanziâts in fuarce des convenzions e gjenere carence di risorsis e inadeguatece tecnologjiche cun diretis consecuencis su la ufierte dedicade previodude. Chestis criticitâts a son motîf fuart di pinsîr ancje a front dal apontament tant impuartant rapresentât di Nova Gorica – Gurize 25, là che la Sede regjonâl, che di agns e à il compit di tutelâ e valorizâ il multilinguisim regjonâl e che duncje e varès di podê vê un rûl fondamentâl. O sotlinei ancje che a vuê no si à gnovis di un sisteme di contabilizazion puntuâl che al permeti di vandi cemût che a son impleâts i fonts assegnâts ai sens des convenzions Guvier – RAI pe valorizazion des minorancis linguistichis presint in Friûl-Vignesie Julie. Dut chest premetût, traviers une interogazion puntuâl, o ai volût sensibilizâ e stimolâ la Zonte regjonâl e la presidence dal Consei Regjonâl par rivâ a gnûfs acuardis passant la riproposizion semplice de convenzion di cumò in jessi tra Stât e RAI”.
“L’obietîf al à di jessi simpri la incentivazion, la promozion e la valorizazion de lenghe furlane intes trasmissions radiotelevisivis su la television publiche in furlan, in plui di par sloven, cun riferiment particolâr ae informazion. Cun di plui al sarà oportun cambiâ ciertis parts des convenzions – al ribat Maurmair – imponint la contabilizazion separade des spesis, garantint cussì che lis risorsis zontadis a servissin dome par cuvierzi coscj dedicadis a valorizâ e promovi lis lenghis minoritariis in Friûl-Vignesie Julie di là di garantî une autonomie finanziarie evitant lis parcelis di comission di RAI.COM otignint un ûs reâl e concret de sede di Udin. Infin al sarà fondamentâl previodi intes tratativis cun Rai dai acuardis dedicâts ae cuviertidure dal avigniment GO25”. (a.d.g.) – 26.09.23
