Prime riunion pal gnûf Consei de ARLeF

Fresc di nomine, al è stât clamât adun, ai 15 di Novembar, il gnûf Consei di aministrazion de ARLeF – Agjenzie regjonâl pe lenghe furlane, cun a cjâf Eros Cisilino, riconfermât ae presidence dopo il mandât precedent, scomençât intal 2018. Vie pes ultimis setemanis, di fat, la Zonte regjonâl e à proviodût a designâ il gnûf Cda cun chestis nominis: Manlio Boccolini,
 Michele De Sabata,
 Paolo Paron, 
Gabriele Zanello e tant che revisôr unic dai conts Giovanni D’Alì. Vie pe riunion, Cisilino al à marcât che «Tai ultins agns o vin puartât indenant ativitâts impuartantis pe tutele de lenghe furlane. O vin fat sieltis coragjosis metudis adun intal “Plan Gjenerâl di Politiche Linguistiche 2021-2025”; un document che al à ricevût supuart di plui bandis, e che al è stât cjapât tant che esempli in plui ocasions. O partirìn propit di chi, ven a stâi di chel che al è stât fat. O vin fondis saldis che nus permetaran di olsâ ancjemò di plui tai agns denant di nô cuntun gnûf PGjPL. Un dai obietîfs al sarà di sigûr chel di insaldâ ativitâts che vuê a son fondamentâls, chês indreçadis ai plui zovins, che a son chei che a coltivaran la lenghe intal avignî”. (A.I.) – 16.11.2023