“E je une vitorie nete”: lu à dit il candidât dal Centriçampe ae Regjon, Massimo Moretuzzo, comentant ai microfons di Telefriuli la vitorie di Massiliano Fedriga aes Regjonâls.
“Par nô – al à zontât Moretuzzo, riferint di vê za telefonât a Fedriga par fâi i compliments e par augurâi bon lavôr – e je stade une partide complicade. E je stade une campagne intense e curte”.
Par ce che al rivuarde il futûr, rispuindint aes domandis di Telefriuli, Moretuzzo al à dit che “la prime propueste di leç che o presentarìn in Consei regjonâl e sarà chê su la dople preference di gjenar. I temis che o vin metût in campagne eletorâl a son bogns. O fasarìn une oposizion cun lealtât e cence berlâ, cemût che o vin fat in campagne eletorâl”, al à concludût il candidât dal Centriçampe. (A.D.G.) – 03.04.2023
