Su la cuistion de sigurece stradâl vuê il Consei regjonâl al à aprovât ae unanimitât la mozion presentade dal conseîr Elia Miani de Lega par inviâ un progjet sperimentâl su la segnaletiche orizontâl clamade fotoluminescente.
Tal so intervent Miani al à sotlineât che “I dâts a mostrin in mût clâr che al è vie pe gnot che si regjistrin i tas di mortalitât plui alts e par chest al covente intervignî. Un dai problemis al è chel de segnaletiche orizontâl, di spes pôc visibil cun consecuencis grivis soredut di gnot e indulà che e je pocje iluminazion”.
Par chest Miani al à proponût di “valutâ la sperimentazion ancje te nestre regjon, di tecnologjiis inovativis za provadis tal forest, tant che la segnaletiche fotoluminescente, buine di cjapâ la lûs dal soreli vie pal di e tornâle indaûr tal scûr, deventant cussì plui facil di viodi ancje se no je la iluminazion publiche”. (a.d.g.) – 14.04.2026
