Il tai dal personâl previodût ae Radiators di Muimans e je une misure necessarie par mantignî la aziende competitive e garantî continuitât e competitivitât.
A confermâlu al è stât l’aministradôr delegât de aziende, Stefano Valente, che vinars passât si è cjatât cul assessôr regjonâl aes Ativitâts produtivis Sergio Bini. Valente al à confermât che, viodude la contrazion de domande, la riorganizazion de aziende e previôt une riduzion dal organic di 40/50 unitâts.
Su la vicende e je intervignude ancje la deputade Debora Serracchiani, che e à deponût une interogazion al Ministri des Impresis e dal Made in Italy Adolfo Urso e al Ministri dal Lavôr e dal Benstâ sociâl Elvira Calderone: “O ai puartât ae atenzion dai ministris Urso e Calderone la crisi aziendâl dal implant Radiators di Muimans che, tant che altris realtâts dal manifaturîr, al patìs par un ralentament de cressite economiche che e je daûr a fâ sintî in Friûl-Vignesie Julie. Al Esecutîf – e riferìs la parlamentâr dem – o ai domandât se, in colaborazion cu la Aministrazion regjonâl dal Friûl-Vignesie Julie, al vueli inviâ ogni procedure buine e necessarie par impedî la pierdite di desenis di puescj di vore”. (a.d.g.) – 16.10.2023
